LJÓÐAGANGAN Í KRISTNESSKÓGI Á LAUGARDAGINN Laugardaginn 12. september verður farin ellefta Ljóðagangan. Að þessu sinni verður far­ið um Krist­nes­skóg í Eyjafjarðarsveit undir leiðsögn Helga Þórssonar. Fjölbreytt ljóðadagskrá í tali og tónum; ketilkaffi og meðlæti að hætti skógarmanna. ATH.: Ekki verður boðið upp á rútuferð en þeir sem tök hafa á að bæta við sig farþegum eru góð­fúslega beðnir að mæta við Amtsbókasafnið kl. 13:30, sem og þeir sem þurfa far. Aðrir mæti við Kristnesspítala kl. 14:00.

Tregawöttin vilja benda lesendum sínum á bókina Af steypu, frá Nýhil, en hún fjallar (meðal annars) um efnisleika ljóða. Meira hér.

Ný Tregawött

Meðal efnis: Gleði, hamingja, rúst, ljóð á ljóðaljóð ofan á ljóðaljóðaljóð ofan! Þýðingar, skáld, myndir – ekkert hefur nokkru sinni verið jafn gott!

Að þessu sinni er blaðið líka prentað og ætti að finnast á víð og dreif um höfuðborgarsvæðið.

Haukur Már Helgason er ritstjóri.

Netútgáfan er pdf!

Hugsa sér!

Tregawöttin vilja byrja á því að biðjast velvirðingar á að hafa verið í örlitlu sumarfríi.

En síðan benda á þetta: Alþjóðleg ljóðahátíð Nýhil hefst á miðvikudag.

Andspyrna fjallar um þrjár nýlegar ljóðabækur: Usli: Kennslubók e. dr. Usla - Ég hata alla e. Bryndísi Björgvinsdóttur og Það sem mér finnst helst að heiminum eftir Ingólf Gíslason.

Eiríkur Örn Norðdahl fjallar um Hvíslur eftir Frosta Friðriksson.

Nýtt tölublað af Tregawöttum: Konur hafa í gegnum tíðina verið notaðar til að selja allt milli himins og jarðar, frá bílum til tannkrems til trygginga og sjálfsvarnarnámskeiða, og nú er röðin komin að ljóðlistinni. Í kvenþemariti Tregawattanna, sem ritstýrt var af Hildi Lilliendahl, er að finna ljóð um konur og eftir konur, ritgerðir um konur og ljóð kvenna, sjónvarpsþátt um konur, þýðingar á verkum kvenna og meira að segja myndir af konum. Smellið hér fyrir herlegheitin.

Út er komin ný ljóðabók eftir Bjarna Bernharð, Blóm í byssukjafta græðginnar. Í tilkynningu segir að í bókinni megi finna óræð myndljóð í knöppu formi, önnur opin og glaðleg, fáein hvassyrtari, en öll séu þau fáguð og beri jafnframt skýr einkenni höfundarins. Meira um bókina hér.

Bókmenntakvöld verður haldið á Populus Tremula, Akureyri, þann 26. júní næstkomandi.  Eigið efni lesa Jóna Hlíf, Gunnar M. G. og Þórgnýr Inguson en einnig koma fram Ingimar Björn Davíðsson og Michael Boudreau og fara með fornar rímur í bland við nútímakveðskap úr Vesturheimi. Dagskrá hefst kl. 10 en hús opnar 21:30. Þetta er jafnframt síðasti viðburðurinn í Populus fyrir sumarlokun.

Laugardaginn 20. júní verður ljóðadagskrá með rokkuðu ívafi í Verksmiðjunni á Hjalteyri. Umsjónarmaður dagskrárinnar er skáldið og rithöfundurinn Einar Már Guðmundsson en sérlegir gestir hans verða söngvaskáldin Kristján Pétur Sigurðsson og Þórarinn Hjartarson. Dagskráin hefst kl. 21:00 og er enginn aðgangseyrir og allir velkomnir. Frekari upplýsingar hér.

Ljóðahaust: Mikið verður um dýrðir í ljóðlistinni síðla sumars og í haust. Fyrst skal nefna að Bókmenntahátíð í Reykjavík 2009, sem haldin verður í september, verður í sambandi við kanadísku Griffin-ljóðlistarverðlaunin, en einn dagur í dagskrá hátíðarinnar verður tileinkaður ljóðalestri og umfjöllun um ljóðlist. Verðlaunin hafa verið veitt árlega frá árinu 2000 og meðal fyrri verðlaunahafa er Íslandsvinurinn Christian Bök. Að þessu sinni eru sjö ljóðabækur tilnefndar til verðlaunanna í tveimur flokkum. Lista yfir tilnefningar ársins má sjá hér, en sigurvegararnir verða tilkynntir 2. júní. Þeir koma svo til Reykjavíkur í haust ásamt sigurvegurum fyrri ára, en safn með ljóðaþýðingum eftir þessi skáld er fyrirhuguð til útgáfu í tengslum við hátíðina í haust. Auk þess að veita verðlaun fyrir nýútgefnar ljóðabækur hafa frá 2006 verið veitt sérstök verðlaun fyrir æviframlag á sviði ljóðlistarinnar. Meðal þeirra sem hlotið hafa þau heiðursverðlaun er sænska skáldið Tomas Tranströmer, en allnokkur ljóð hafa birst eftir hann í íslenskum þýðingum, m.a. eftir Jóhann Hjálmarsson, Pjetur Hafstein Lárusson og Njörð P. Njarðvík.

Í ágúst verður svo haldin hin árlega Ljóðahátíð Nýhils. Tregawöttin hafa hlerað að á meðal erlendra þátttakenda í ár verði bandaríska skáldið Sharon Mesmer, hin danska Mette Moestrup, sænski sálgreinirinn Ulf Karl Olov Nilsson, finnlandssvíinn Cia Rinne og margir fleiri. Þá munu fleiri viðburðir á hátíðinni í ár og meðal annars boðið uppá ljóðabíósýningu.

Tregawöttin verða opinber fjölmiðlungur hátíðarinnar og mun ágústblaðið prentað á PAPPÍR (auk þess sem það birtist í stafrænni útgáfu hér á netinu).

Einnig er von á bókinni Af steypu fyrir ljóðahátíð, en hún inniheldur verk og greinar um efnislega (konkret) ljóðlist, í ritstjórn Eiríks Arnar Norðdahl og Kára Páls Óskarssonar.

Jón Kalman Stefánsson hefur þýtt tvö ljóð eftir Charles Simic og birtast þau á Bjartsvefnum.

Neyðarkall frá ritstjóra næsta tölublaðs Tregawattanna:

Sælinú.

Nýjasta hefti Tregawattanna er smátt og smátt að komast í farveg en þar er enn pláss fyrir eitthvað efni. Þemað er konur og svo vitnað sé í gamalt ákall:

Ljóðavefritið Tíu þúsund tregawött kallar eftir efni til birtingar í vefritinu. Efnið má vera í formi ljóðs, ljóðaþýðingar, greinar um ljóðlist, myndljóðs, upplesturs, hljóðaljóðs, ljóðmyndar, konkretljóðs, sögu um ljóðlist, ljóðasögu, söguljóðs eða hvers þess forms sem skáldinu þykir skemmtilegast og best að beygja innihald sitt undir.

Æskilegt er að efnið hafi hvurgi birst opinberlega en það er þó ekki skilyrði. Sérstaklega óska ég eftir einhverskonar ritdómum.

Ég vek athygli á tvennu: Annars vegar er slík umfjöllun undanþegin þemanu. Konur þurfa ekki nauðsynlega að koma við sögu í þeim eða vera höfundar, þótt slíkt sé vitanlega velkomið.

Hitt: Orðið ritdóm ber alls ekki að taka of hátíðlega, mér þætti sérlega vænt um að þeir væru með óhefðbundnu sniði. Þeir mega t.a.m. vera í formi myndljóðs sem væri andsvar við verki eða bók. Þeir mega vera almenn hugleiðing, bálkur eða ein lína, kannski SMS um ljóðabók. Rýni sem er unnin upp úr orðunum í hinni rýndu bók? Nafnlaus rýni? Stjörnugjöf? Exklúsív stjörnugjöf og engin orð?

Í öllu falli þætti mér afar vænt um að fá frá ykkur efni hið fyrsta, skáld og pælarar um veröld alla.

Bestu kveðjur,
Hildur.

Félag um Ljóðasetur Íslands í samstarfi við Kómedíuleikhúsið frumsýnir ljóðaleikinn Þorpið í Patreksfjarðarkirkju á laugardag. Þorpið er einhver þekktasta og markverðasta ljóðabók sem gefin hefur verið út á Íslandi og hefur notið fádæma vinsælda allt frá því hún kom fyrst út árið 1946. Frekari upplýsingar hér.

Tregawöttin vilja benda lesendum sínum á hina kjaftgapandi áhugaverðu ljóðabók Biscayne BLVD - buslubókina úr sílikoni - úr smiðju Magnúsar Árnasonar og Ófeigs Sigurðssonar. Smellið hér fyrir meira.

Á morgun, föstudaginn 22. maí, verður haldið svonefnt Summer Poetry Jam á Kaffi Rót, Hafnarstræti, Reykjavík. Dagskráin er sem hér segir (með eyðum):

17:00-17:20    Jón Þór Sigurðsson
17:30-17:50    Daniel Norman Tumasson
18:00-18:20    ???
18:30-18:50    Nikulas Ári Hannigan
19:00-19:20    ???
19:30-19:50    Robin Vaughan-Williams
20:00-20:20    Marc Vincenz
20:30-20:50    Helgi Jónsson
21:00-21:20    Mark Andrew Zimmer
21:30-21:50    Magnús Ívar Markússon

22:05-22:50    Radio Active Meltdown (hljómsveit)